Plantun de Prouvènço

Pèr coumpara dos planto d'encò nostre

Cyanus montanus & Eschscholzia californica

Cyanus montanus

Asteraceae Compositae

Noms en français : Bleuet des montagnes, Bleuet vivace.

Descripcioun :
Lou blavet-de-mountagno trachis en coulounìo dins li prado umido e lis esclargido de fourèst, en mountagno. Fai de fueio pulèu grando, en lanço, entiero que remounton un pau sus la cambo. I'a pas trop pèr s'engana. Coumpara pamens emé la centaurèio-de-Trionfetti que li cambo porton mai d'uno flour. Isto uno meno proche, pas toujour bèn couneigudo, Cyanus semidecurrens que trachis dins li relarg mai secarous e que se destrìo qu'a li bratèio emé de ciho bruno un pau coume Cyanus triumfettii.

Usanço :
Couneissèn pas d'usanço particuliero pèr aquelo planto. Fau saupre que soun cousin, lou blavet di champ èi manjadis e a d'ùni prouprieta interessanto.

Port : Erbo
Taio : 20 à 60 cm
Fueio : alterno
Tipe bioulougico : Emicriptoufite
Cicle bioulougico : Planto renadivo

Gènre : Cyanus
Famiho : Asteraceae
Famiho classico : Compositae
Tribu : Cardueae
Ordre : Asterales

Coulour de la flour : Bluio
Petalo : >6
Ø (o loungour) enflourejado : 45 à 70 cm
Flourido : Printèms - Estiéu

Sòu : Ca
Autour basso e auto : Pancaro entresigna
Aparado : Noun
Mai à juliet

Liò : Prado - Prado à rousèu - Esclargido
Estànci : Mountagnard à Subaupen
Couroulougi : Ouroufito-Éuropenco
Ref. sc. : Cyanus montanus (L.) Hill, 1768 (= Centaurea montana L., 1753 )

Pavot(-de-Califournìo)

Eschscholzia californica

Papaveraceae

Nom en français : Pavot de Californie.

Descripcioun :
Lou pavot-de-Califournìo se rescontro d'aqui e d'eila dins lis escoumbre e lis ermas proche d'oustau. Es un poulit pavot fourestié emé de gràndi flour jauno o aranjado e de fueio que dounon d'èr à-n-aquéli di fumo-terro. Lou fru (boursèu) se raprocho de li de l'erbo-dóu-faiò.

Usanço :
Estènt un pavot, a d'usanço proche de Papaver somniferum, pamens en mens fort (e sa culturo es autourisado). Es un remaiso doulour, ajudo à dourmi e èi bon contro lis ànçi. Ei bessai manjadis, coume lis àutri pavot, mai n'en sabèn pas rèn.